D’Ericthon.

CHAPITRE XII.

Liure 4. Chap. 5.Nous auons dit cy deſſus que Vulcan ayant forgé les armes par leſquelles Iupin défit les Geans, pour payement & recompenſe de ſes peines & diligences eut de luy promeſſe ratifiee par le ſermẽt ordinaire des Dieux, à ſçauoir, par le maraiz du Styx, de luy octroyer tout ce qu’il demanderoit. Là deſſus Vulcan s’ingera par le conſeil de Neptun, de demander en mariage Pallas, à laquelle Iupiter auoit concedé cette grace de demeurer vierge à iamais ; ce qu’il ne luy pult refuſer à cauſe du ſerment par luy faict, mais il auertit ſecrettement Minerue qu’elle l’eſconduiſit. Ainſi doncques Vulcan allant trouuer la Deeſſe, & de prime abord la voulant embraſſer, on dit que comme elle l’empeſchoit de venir aux priſes, il eſpancha ſa ſemence tout au long des cuiſſes d’icelle, qu’elle eſſuya auec vn floquet de laine, & le ietta en terre, d’où ſe forma vn homme. C’eſt pourquoy Pauſanias en l’Eſtat d’Attique dict que cettuy-cy n’eut aucun homme pour pere ; mais pource qu’il naſquit de contention (à ſçauoir de l’eſtrif qu’il eut auec Minerue) & de la terre, il fut nommé Erichthon, de ces deux mots eris, noiſe ou debat ; & chthon, terre. Euripide en ſon Io l’appelle Terre-né, & dit qu’il fut nourry parmy des ſerpens qui l’auoient en garde, puis aprés mis entre les mains des Damoiſelles Atheniennes, leſquelles depuis firent porter à leurs enfans des ſerpens d’or. Toutesfois d’autres enſeignent que le nom d’Erichthon ne prouient pas du mot eris, qui ſignifie diſpute ou contention ; mais bien d’erion, c’eſt à dire laine, pource que Minerue s’en eſſuya, comme nous auons ouy. Dés lors les Atheniens furent appellez Terre-nez. Au reſte il ne ſe nomme pas ſeulement Erichthon, mais auſſi Erechthee ; ainſi l’appelle Homere au Catalo- gue. Il auoit les cuiſſes & les iambes en façon de ſerpent ; & dés qu’il fut né Minerue le receut & l’enferma dans vn coffret, qu’elle donna en garde à Aglaure, Herſe & Pandroſe ſœurs, leur enioignant expreſſément de n’eſtre point ſi curieuſe que de regarder ce qu’il y auoit dedans. Pandroſe ſuiuit bien le commandement de la Deeſſe, mais ſes autres ſœurs ouurans le coffret apperceurent Erichthon : & dés qu’elles l’eurent veu, furent ſurpriſes d’vne ſi male rage, qu’elles ſe precipiterent du haut d’vne tour en bas, & moururent, dit Pauſanias és Attiques. Quelques-vns diſent qu’Erichthon fut fils de Vulcan & d’Athene fille de Cranaus. Apollodore au 3. liure eſcrit que Pallas nourrit depuis cet accident Erichthon dedans ſon temple, lequel eſtant en aage, & ayant eſté inſtallé Roy d’Athenes, poſa l’image de Minerue ſa mere nourrice en la citadelle d’Athenes, & en l’honneur d’icelle ordonna cette notable feſte & ſolemnité dicte Panathenee, combien que les autres ſouſtiennent l’inſtitution en auoir été faicte par Theſee. Il eſpouſa la Nymphe Paſithee, ou Phraſithee, de laquelle il eut Pandion ſon ſucceſſeur, & deux filles, Orythie & Procris : & fut le quatrieſme Roy d’Athenes, ville fondee & baſtie par Cecrops venu d’Egypte, laquelle il nomma du nom de Minerue, que les Grecs appellent Athéné. Cet homme eſtoit biforme, ayant le bout du corps aboutiſſant en forme de ſerpent ; & le haut d’homme ; ce que quelques-vns tiennent auoir eſté feint à cauſe de la connoiſſance qu’il auoit des deux langues, Egyptienne & Grecque : les autres diſent, pource qu’il eſtoit ſage & vaillant : les autres, pource qu’il eſtablit aux Atheniens certaines loix de mariages & alliances, leſquels auparauãt ſe peſlemeſloient indifferemment, & par ce moyen perſonne ne connoiſſoit ſon pere, mais ſeulement ſa mere. Ie ſuis d’vn autre auis, & croy qu’on le faict demy-homme & demy ſerpent, parce qu’il diſcernoit fort ſagement les ſaiſons, & de rigueur & de clemence. Car c’eſt le deuoir d’vn bon & ſage Prince de iuger auec meure diſcretion du temps d’humanité & de ſeuerité, comme ainſi ſoit que certaines nations veulent en quelques ſaiſons eſtre gouuernees auec rudeſſe & crainte : les autres ſe rangent mieux par douceur & gracieuſeté. L’on dit qu’Erichthon pour cacher la diformité de ſes cuiſſes & de ſes iambes inuenta l’vſage des chariots & l’attellage de quatre cheuaux, duquel Virgile au 3. des Georgiques rend ce teſmoignage :

Premier aux chariots oſa iondre deux paires De cheuaux Erichthon, & ſur roues legeres Se fit porter vainqueur.—

Aprés Cecrops Cranaus regna, auquel ſucceda Amphiction, ſpolié de ſon Royaume par cettuy-cy. Voyez la perpetuelle faim d’Erichton par vengeance de Cerés liure 5. chap. 14.Il y a eu vn autre Erichthon, duquel fait mention Apollodore au 3. liure, & regna à Troye aprés celuy qui d’Aſtyoche ſa femme, fille de Simoïs engendra Tros, teſmoin Homere au 20. de l’Iliade.

¶Voila la Fable d’Erichthon depeſchee, en l’explication de laquelle nous ſerons brefs, à cauſe de ce que nous auons expoſé cy-deſſus au diſcours de Vulcan, où nous auons montré pourquoy c’eſt qu’on le faict fils de la terre & de Vulcan ; & que c’eſt que Minerue, qui auoit obtenu de ſon pere vne perpetuelle virginité ; à ſçauoir, la plus pure partie de l’air, nee de la teſte de Iupin, de laquelle ne prouiennent aucuns animaux : mais Vulcan eſt le feu impur en matiere, ou pluſtoſt la chaleur qui ayde à la generation, & tumbant en terre engendre diuers animaux. C’eſt pourquoy l’on dict qu’Erichthon fils de luy & de la Terre eſt vne forme ſi eſtrange. Les ſœurs de Pandroſe deuindrent inſenſees & furieuſees, pour n’auoir daigné obeyr aux aduertiſſemens de la Deeſſe ; & pourtant ils vouloient donner à connoiſtre qu’il eſt fort dangereux d’eſtre plus curieux que Dieu ne commande, puis que beaucoup de perſonnes s’en ſont tres-maltrouuees ; car pluſieurs pour auoir mis le nez aux conſeils & ſecrets ſoit des hommes, ſoit des Dieux, ont eſté proditoirement ou par diuine vengeance mis à mort. Or diſons auſſi quelque choſe d’Achille.