De Palés.

CHAPITRE XIX.

PALÉS a eu la reputation d’eſtre la Deeſſe des paſtres, & de faict les Poëtes la conioignent ſouuent auec Apollon ; comme fait Virgile en la 5. Eclogue :

—& Palés & Phœbus, Ont außi triſtement quitté les champs herbus.

Et au troiſieſme des Georgiques :

Ie veux chanter, Palés, ton nom que tant on priſe, Et ton los exalter, ô grand Berger d’Amphryſe.

Les Poëtes Grecs n’ont point connu cette bonne Dame, pour le moins n’en font-ils point de mention que i’aye encore veuë quelques Latins diſent qu’elle fut ainſi nommee de palea, c’eſt à dire paille. Et de faict on celebroit certaine feſte en ſon honneur nommee Palilia, c’eſt à dire feſte de Palés, particuliere aux Bergers, qui arrangeoient des tas de paille en vn lieu plain & vny, puis y mettoient le feu, & ſautoient par deſſus l’vn aprés l’autre : comme le teſmoigne Ouide au quatrieſme des Faſtes :

Sur des tas arrangez de paille petillante Paſſe d’vn ſault leger ſur la flamme brillante.

Cette feſte ſe faiſoit emmy les champs le 1. de May, iour de la fondation de Rome par Romulus. Quelques-vns qualifient cette Palés du nom de Grand-mere, & de Veſte.