De Tithon.

CHAPITRE V.

Genealogie de Tithon.TITHON, que l’Aurore ayma tant à cauſe de sa belle taille & bonne façon, fut fils de Laomedon, & frere de Priam, toutefois de diuerſes meres : car la mere de Priam fut Leucippe, mais celle de Tithon fut Strymo, ou Rhœo (ſelon d’autres) fille de Scamander. On dit que l’Aurore amoureuſe Tithon, l’enleua aux Cieux, & les Parques obtindrent ſon immortalité : mais l’Aurore s’eſtant oubliee de demander par meſme moyen qu’il ne vieilliſt iamais, il deueint ſi vieil, que pour le faire dormir il le falloit bercer & emmaillotter comme vn enfant. Mué en Cigale.Mais en fin elle le conuertit en Cigale, qui poſans leur vieille peau ne meurent point, mais raieuniſſent. Ce qui luy auint à cauſe du dueil & faſcherie qu’il endura pour la mort de ſon fils Memnon ; Car en ayant eu auis, il ſecoüa & eſtendit ſes bras, comme s’il euſt voulu prendre ſa volee pour l’aller voir : & lors les aiſles luy vindrent, ce qu’aſſeure Horace au 1. liure des Carmes, diſant que celuy qui ſembloit s’eſtre deſia faict immortel, à qui les aiſles eſtoient venuës, eſtoit en fin treſpaſſé. Les autres diſent neantmoins qu’il pria l’Aurore ſa femme de pouuoir poſer cette immortalité, ne pouuant plus à cauſe de ſa vieilleſſe prendre gouſt aux ioyes de ce monde, ce que n’eſtant poſſible de luy accorder, elle le tranſmua en vne Cigale. On dit que Tithon baſtit la ville de Suſes, prés de Choaſpe, riuiere de Perſe, qui fut iadis tres-puiſſante & riche ville, & le ſiege de l’empire des Perſes. Or combien que Tithon fuſt giſant en vn berceau à cauſe de ſon extreme vieilleſſe, Virgile toutefois dit en quelques endroits de ſes œuures que

L’Aurore ſe leuant elle laiſſe la couche Iaunissant de Tithon.—

Ses enfans.Tithon eut de l’Aurore deux fils, Memnon & Emathion, du nom duquel fut nommee vne belle & bonne region de l’Europe, qui depuis fut dicte Macedoine (aucuns diſent auſſi qu’elle engendra les vents d’Aſtære Titan) & vne fille Iodame. Voila preſque tout ce qu’on en trouue.

¶Mythologie hiſtorique de Pithon.Ceux qui ſe mettent en deuoir d’accommoder cecy à quelque verité d’hiſtoire, diſent que Tithon eſpouſa vne femme vers l’Orient, que les hiſtoriens & Poëtes aueugles en l’antiquité, nommerent Aurore, pource qu’eſtant couſtumier de ſe leuer matin, il bandoit quand & quand la pointe de ſon eſprit aux moëlles de Sapience (c’eſt à dire à la recherche des variables viciſſitudes du ciel & de nature) dés que l’Aube du iour auoit eſteint les feux qui luiſoient de nuict. Il eut de cette femme les enfans ſuſnommez, & paruint à telle vieilleſſe, qu’il le falloit dorloter & traiter tout ainſi qu’vn enfant. C’eſt ce qui fit dire que l’Aurore l’auoit aymé & pris pour ſon mary, à cauſe de la temperie des lieux Orientaux, où il veſquit ſi long temps qu’il ſembloit que iamais il ne deuſt mourir. Expoſitiõ de ſa metamorphoſe en Cigale.Ce qu’ils diſent qu’il fut metamorphoſé en Cigale, que ſignifie-il autre choſe que le babil des vieilles gens, qui ſont pour la pluſpart importuns, faſcheux, aymans à ſe glorifier, & loüer le temps paſſé, meſpriſans le preſent, tel qu’Homere deſcrit ſon Neſtor ? Or laiſſant paſſer quelque ſotte allegorie que quelques-vns font là-deſſus, ie croy que les Anciens ont forgé cette Fable pour nous exhorter à porter patiemment les viciſſitudes du tric & trac des affaires de ce monde, qui ſont toutes bornees par la mort, par laquelle Dieu a ordonné à tous les hommes de paſſer. Car combien que l’Aurore euſt impetré des Dieux que Tithon veſquiſt eternellement, ſi eſt-ce que luy-meſme les ſupplia bien-humblement qu’il luy fuſt permis de mettre fin à ſa vie, croyant luy eſtre plus expedient de quitter vne fois ce monde, que d’eſtre ſans fin aſſailly de tant de faſcheries & de difficultez de nature. Prenons maintenant Paſiphaé.