MYTHOLOGIE ov EXPLICATION DES FABLES.

LIVRE SEPTIESME.

Que les hommes Illuſtres ont acquis de la gloire auecque raiſon, pour auoir obligé le public.

CHAPITRE PREMIER.

CERTES il n’y a point de plus ſaincte loy, ny de plus belle ordonnance, que celle qui recompenſe dignement les vertus des braues hommes, & punit les delinquans ; car c’eſt vne choſe equitable, que non ſeulement les hommes ſoient empeſchez de mal-faire, mais auſſi incitez à ſuiure la vertu, & s’appliquer à de valeureux actes ; afin qu’ils ne paſſent cette vie en oyſiueté & nonchalance. C’eſt cette seule conſideration par laquelle Hercule & les autres Preux tant renommez furent induits à courageuſement entreprendre beaucoup de trauaux, de hazards & de braues exploits de façon qu’ils n’ont rien trouué, ne ſi horrible, ne ſi mal-aiſé, que par trauail, & patience il n’ayent ſurmonté. Car ce qu’ils ont purgé le monde de tant de voleurs, qu’ils ſont deſcendus aux Enfers, qu’ils ont combatu & dompté d’horribles monſtres, qu’ils ont rembarré, voire eſteint la cruauté de pluſieurs tyrans, ç’ont eſté les recompenſes & ſalaires de leur vertu. Or le plus excellent loyer qu’ait la vertu, c’eſt la gloire, qui a de merueilleux aiguillons pour accourager les affections des hommes à de belles & valeureuſes entrepriſes ; & leur faire trouuer legeres, vnies & faciles les plus faſcheuſes, raboteuſes & difficiles choſes du monde. Auſſi nulle ville, ny nation, ny eſtat ne pourroit eſtre fleuriſſante ny de duree, s’il ſe contentoit ſeulement de chaſtier les mal-faicteurs, ſans auoir aucun eſgard au merite des gens de bien, joint que cette ville ſeule peut eſtre heureuſe, qui ſçait deferer aux bons & gens d’honneur ſes dignitez & charges de iudicature. Celle qui le ſçaura bien faire, ſera d’autant plus noble & plus fleuriſſante, qu’elle ſera ſoigneuſe de s’en bien & deuëment acquitter. Nous auons vne ſuffiſante preuue de ce que ie viens de dire en l’Empire Romain, qui ſouuentefois a eſté commis à la ſuffiſance de gens de bien, quoy qu’eſtrangers. Les Atheniens auſſi ont bien ſouuent donné la ſouueraineté de leur Republique à des Forains, eu eſgard à leur valeur & preud’hommie. Au contraire, la ville qui n’ouure les portes, & ne tend les bras qu’à ceux là ſeulement qui ſont nez & nourris chez elle ; qui les ferme pour tout iamais à la vertu & vaillance des eſtrangers, qui ſans faire eſtat de la preud’hommie des perſonnes, meſmement entre ſes citadins, appelle aux offices & eſtats publics bons & mauuais indifferemment : qui propoſe bien des punitions pour les crimes, mais point de salaire pour la vertu : ou qui meſme ſe penſe eſtre bien acquittee de ſon deuoir, eſtabliſſant quelques legeres peines aux meſchans : comment ne la qualifiera-on laſche, nonchalante & libidineuſe ? comment eſt-ce que quand de folles, voire mauuaiſes perſonnes, manieront ſon Eſtat ne ſe tournera-elle en vne inſupportable tyrannie ? comment ne ſera-elle oublieuſe voire ingratte des biens, plaiſirs & ſeruices qu’on luy aura faits ?cõment s’empeſchera-elle de vieillir & croupir au milieu d’vn bordeau ? Car l’eſprit de l’homme ne peut eſtre oiſif ny inutile, s’il ne s’applique à d’honneſtes exercices, il faut neceſſairement qu’il s’addonne à toutes ſales & indignes occupations, & ſi l’on ferme la porte aux vertus, on l’ouure par conſequent aux vices & meſchancetez, puis qu’ainſi eſt qu’il faut neceſſairement s’exercer à quelque choſe.