De la Bize, ou de Boree.

CHAPITRE XII.

LES Autheurs des Fables ne nous apprennent point de quelle race fut ce Boree, ne qui furent ſes parens, ſinon que quelques vns le font fils d’Aſtræe. Rapt d’Orithye par Boree.Ils diſent qu’Erechthee Roy d’Athenes auoit vne tres-belle fille nõmee Orithye, laquelle Boree ayant vne fois apperceu cueillant des fleurs auprés de la fontaine de Cephiſe, il fut eſpris de ſon amour, & du commencement vſa de douces prieres & de flatteries pour en iouyr. Mais voyant que plus il la ſupplioit, plus l’Infante le deſdaignoit, il ſe delibera de l’auoir de force, & de fait l’enleua, & l’emporta en Thrace : & pour cette cauſe les Poëtes l’appellent Thracien, & diſent qu’il auoit là ſon domicile. Les autres maintiennent qu’il la rauit auprés de d’Iliſſe, riuiere celebre en l’Attique, cõme elle s’esbatoit auec d’autres damoiſelles & filles. C’eſt l’auis de Pauſanias en l’Eſtat d’Attique, & de Denys en la ſituation du monde. Le Poëte Simonide appelle cette riuiere, non pas Iliſſe, mais Briliſſe ; & dit qu’il l’emporta en Thrace ſur la roche qu’on appelloit Sarpedon, prés de la montagne d’Æme : & Callimache au bain de Delos dit que Boree demeuroit en vne grotte en cette meſme montagne. Pareillement Apollonius au 1. liu. dit qu’Orithye danſoit du long de la riuiere d’Iliſſe en l’Attique, lors que Boree s’amouracha d’elle, & l’emporta ſur la roche de Sarpedon. Ouide au 6. des Metamorphoſes, dit qu’Orithye fut tranſportee en Ciconie prouince de Thrace, & que la furent celebrees les nopces de Boree & d’Orithye, de laquelle il eut deux Gemeaux :

Boré’ ſa fuitte n’eut à trauers l’air finie Iuſqu’à tant, rauiſſeur, qu’il vint en Ciconie, Où femme elle deueint du tyran englacé, Et mere de Gemeaux dés qu’il l’eut embraſſé.

Enfans de Boree.On ne ſçait (dit Ouide) ſi ces deux beſſons nommez Calaïs & Zethés, naſquirent auec des aiſles ; tant y a qu’elles leur creurent quand & quand le poil & les cheueux : & pour cette cauſe ils ſont communément appellez, Enfans aiſlez de Boree, ou de la Biſe, puis eſtans venus en aage, ils ſe mirent en la compagnie des autres Princes auec Iaſon pour le voyage de la toiſon d’or : auquel voyage le Roy Phinee leur ayant faict bonne & courtoiſe reception, Voyez le ſupplice de Phinee au 7. liur. chap. 6.ils le deliurerent des Harpyes, qui luy faiſoiẽt mortelle guerre, & luy empunaiſiſſoient ſa viande : & les ayans pourſuiuies iuſques aux iſles Plotes, Iris leur commanda de par Iunon qu’ils ſe deportaſſent de perſecuter plus ou- tre les chiens de Iupiter. Ainſi dõcques ils s’en retournerent ; & depuis ces Iſles furent nommees Strophades, comme nous auons dit plus amplement au chapitre des Harpies. Puis aprés quand ce vint à partager les preſens que Iaſon auoit donnez à ceux qui l’auoient accompagné, Hercule les tua tous deux à coups de fleches, pource qu’ils s’oppoſerent à ce que la nef d’Argo ne rebrouſſaſt pour reprẽdre Hercule, qui eſtoit deſcendu pour aller à la queſte de ſon mignon Hilas, lequel en allãt querir de l’eau douce auoit eſté rauy par les Nymphes. Car Telamon s’en vouloit prendre à Typhys, pilote du vaiſſeau ; mais Calaïs & Zethes le garentirent. Semus dit qu’il les occit par enuie, pource qu’ils l’auoient gaigné à la courſe : Nicander de Colphon, parce que cõme Hercule s’en reuenoit, Boree luy ſuſcita vne eſtrange & dangereuſe tourmente en l’iſle de Co, il vengea cette iniure ſur les enfans dudit Boree. Aprés leur mort ils furent tranſmuez en ces vents qui precedent le leuer de la Canicule enuiron de huict iours : & pour ce ſuject ſont appellez Prodromes par les Grecs, c’eſt à dire, Auant-coureurs. Boree eut auſſi d’Orythie vne fille dicte Cleopatre, qui depuis eſpouſa Phinee, duquel nous venons de parler, & luy engendra Crambre, Oryte & Hæme : les autres diſent Thyre & Maryandin, & l’appellent non Cleopatre, mais Arplice. Herodote en ſa Polymnie eſcrit que l’Oracle enioignit aux Atheniens, lors que Xerxe, Roy de Perſe paſſoit en Grece auec cette tant admirable armee nauale pour mettre la Grece toute en feu & à ſang, d’implorer le ſecours de leur gendre Boree ; lequel à leur requeſte heurta de telle impetuoſité la flotte de Perſe, qu’il noya grande quantité de leurs vaiſſeaux, & affoiblit grandement la force de leurs ennemis. Au reſte Callimache en l’hymne ſuſdit maintient que Boree eut de ſa bien-aymee Orythie trois filles, Vpis, Loxo & Hecaerge, deuant que d’engendrer aucuns maſles. Quelques-vns veulent dire qu’il eut outre Calais & Zethes vne fille nommee Chione, c’eſt à dire Neige. Cleanthe eſcrit que Boree rauit auſſi Cloris, fille d’Arcture, & qu’il l’emporta ſur la montagne de Niphate, & que la croupe ſur laquelle il la poſa fut depuis appellee Lict de Boree, deuant qu’on la nommaſt Caucaſe. De cette Chloris il eut vne fille Hyrpace. Toutefois les autres diſent que Chloris eſt celle meſme que les Latins nõment Flora, Deeſſe des fleurs, laquelle mariee, non à Boree, mais à Zephyre, obtint de ſon mary d’auoit puiſſance & ſeigneurie ſur toutes les fleurs. Voila ce que les Anciens nous content de Boree.

¶Mythologie hyſtorique de Boree.Hexagoras en l’hiſtoire de Megare, eſcrit que Boree rauiſſeur d’Orithye eſtoit vn ieune homme ainſi nommé, fils de Strymon, lequel l’ayant demandee en mariage à ſes parens, & ne l’ayant peu obtenir, ſe reſolut de l’enleuer, & l’ayant rauie la tranſporta en Thrace : combien que d’autres ſouſtiennent que ce ne fut pas Boree, mais bien vne trouppe de ieunes hommes de Thrace qui firent ce rapt en faueur de Boree, comme Ouide l’enſeigne en l’epiſtre de Pâris en ſon Helene :

Les Thraces pour Boré rauirent l’Erecthide : Sans guerre fut pourtant la marche Biſtonide.

Les autres veulent dire qu’Orithye cheut du haut d’vne roche en la mer, & que pource qu’on ne la pût trouuer, on fit courir le bruit que Boree s’en eſtoit amouraché, & l’auoit emportee en Thrace. Quant à ce qu’on dit des Harpyes chaſſees de la table de Phinee, quelques-vns tiennent qu’il auoit deux filles, Harpye & Eraſie, leſquelles par leur ſale & desbordee vie luy faiſoient vne extréme deſpenſe, & le ruynoient en frais. Les enfans de Boree les emmenerent toutes deux ; & depuis le bruit courut qu’ils auoient deliuré Phinee de la famine & pauureté qui l’affligeoit. Ie ne voy point qu’outre l’hiſtoire cette Fable contienne choſe de merite. Ie lairray donc le ſurplus aux plus doctes ; & entreray au diſcours de Scylle & Charibde.