Explication naturelle de Iunon.

IVnon fut fille de Saturne, pource que Dieu crea premierement le ciel : puis apres du cours du ciel naſquit le temps, & de cettuy-cy l’Ether, puis les Elemens, deſquels le plus haut apres Iupiter, c’eſt l’air, à ſçauoir, Iunon moderatrice de la vie humaine, qui engendre les pluyes & greſles. De la chaleur de l’air naiſſent les animaux & plantes ; & ſelon qu’il eſt aſſaiſonné, nos humeurs & complexions ſe forment ordinairement. Et parce que l’air s’engendre prochainement de l’eau, l’on dit qu’elle fut nourrie par l’Ocean & Thetis. Quand la vertu de l’Ether agit en l’air pour la procreation des animaux, elle eſt femme de Iupiter : quand elle ſe tourne en feu, on dit qu’elle engendre Vulcan ; & d’autant que la faueur & benignité de l’air eſt fort dui- ſible & commode aux creatures naiſſantes, on luy a donné la ſuperintendance des mariages. Voila comme quoy les Anciens ont montré le lieu de l’air, ſes facultez & actions, d’où il prouient, en quel element il ſe conuertit premierement, quel eſt l’element qui agit & deſploye ſes forces en ſon endroit ; & que ledit air à beaucoup de puiſſance ſur les mœurs d’vn chaſcun, & ſur la naiſſance de toutes creatures.