DIane & Apollon ſont enfans de Latone & de Iupiter. Cette Fable ſignifie la naiſſance & creation du monde ; car la matiere d’iceluy eſtant du commencement confuſe en vne maſſe & ſans forme, parce que toutes choſes eſtoient encore obſcures & cachees, ces tenebres là furent appellees Latone. Phœbus & la Lune furent extraits hors de ces meſmes tenebres par Iupiter, c’eſt à dire, par l’eſprit du Seigneur, diſant, Que la lumiere ſoit faicte ; de laquelle lumiere Phœbus & Diane, c’eſt à dire le Soleil & la Lune ſont autheurs. Ainſi doncques ils enſeignoient que la creation du monde auoit commencé par la lumiere. Mais nous en diſcourerons plus amplement cy aprés en ſon lieu.