Des champs Elyſiens.

MAis pource que nous auons expoſé les griefs & eternels ſupplices propoſez par les anciens aux meſchans apres leur deceds, pour les deſtourner de tous maux & de toute vilainie ; il ſemble eſtre neceſſaire de diſcourir ſommairement des recompenſes propoſees par eux meſmes aux gents de bien pour les attraire à la vertu & ſaincteté de vie. Ils auoient doncques deux iſles, eſquelles ſouffloient doucement de gracieux vents & de ſouëfue odeur, comme s’ils euſſent paſſé par vn païs ionché de fleurs de bonne ſenteur : la terre en eſtoit fertile & de bon rapport, produiſant toutes ſortes de biens ſans œuure d’homme : la plaine tapiſſee de iolies fleurs, abõdante en fruits tels qu’on euſt ſceu deſirer, reueſtuë des plus beaux & meilleurs arbres qui ſe puiſſent imaginer : les vignes rapportoient des raiſins tous les mois : l’air ſain & temperé, point ſujet à changement de temps : car tous vents & malins & pernicieux en eſtoient bannis : ou bien s’ils paruenoient iuſques-là, ils ſe laiſſoient en chemin & ſe deſpoüilloient de toute leur inclemence & malignité deuant qu’y arriuer. Les vents d’occident leur ſuſcitoient quelquefois de douces & plaiſantes pluies, deſquelles toutefois le païs n’auoit que bien peu ſouuent faute à cauſe de la bonté de l’air. Là ne ſe voyoient que de gentils petits oiſeaux degoiſans tous enſemble vn plaiſant concert, harmonie & muſique tant que l’annee dure. Là ſe chantoient des airs & chanſons auec vne merueilleuſe ſuauité ; les belles filles dançoient auec les ieunes gents au ſon des inſtruments de muſique touchez & pinſez par d’excellens maiſtres. Les viures y croiſſoient tres-ſalubres & de tres-bon gouſt : on n’y vieilliſſoit point ; on n’y ſentoit point de maladie, point de trouble d’eſprit, point de conuoitiſe d’or ny d’argent. L’ambition n’y trauailloit point les ames bien-heureuſes : chacun aimoit mieux viure en ſon particulier, ſe contentant de ce qui luy eſtoit neceſſaire, que de iouïr de grands honneurs & dignitez. Là chacun s’exerçoit aux meſmes eſtudes & vacations que durant ſa vie il auoit aimees.