Du Typhon.
AVſſi pour exprimer la nature des vents ou des embraſſemens ſouſterrains, les Anciens ont forgé cette gentille Fable de Typhon, diſans que ſa teſte donnoit iuſques aux cieux, & que d’vne main il atteignoit l’Orient, & de l’autre l’Occident. Car les vents commencent à ſouffler de la plus haute partie de l’air, & s’eſpandent iuſques au bouts du monde. Et pour declarer leur viſteſſe, ils ont dit que Typhon auoit le corps tout couuert de plumes, & pluſieurs teſtes, à cauſe des diuers effects des vents. Et pource qu’ils ſont quelquefois dommageables, ils luy ont donné des cuiſſes & iambes recroquillecs en ſerpens. Iupiter l’aſſomma, pource que la temperature du ciel & du Soleil les gouuerne. Toutefois les autres accommodent cette Fable à l’hiſtoire, comme l’on peut voir en ſon lieu.