ET pour donner à connoiſtre que la ſageſſe eſt vn don de Dieu, & que l’on n’acquiert aucune vertu ſans la volonté de Dieu, ils ont feint Hercule (qui repreſente vne grandeur de courage, force de corps, probité, & valeur à donner la chaſſe à tous vices, & fouler aux pieds toutes ſortes de voluptez) fils de Iupiter. Car ceux qui par vne ſinguliere integrité & beneficence employent leur vie pour le bien & proffit public, acquierent non ſeulement vne glorieuſe reputation, mais approchent auſſi fort prés de la nature diuine. Or pour nous encourager à ce faire, l’exemple d’autruy ſert de beaucoup, & premierement il faut défaire ces dangereux monſtres, orgueil, cholere, arrogance & fureur d’eſprit, chaſſer de noſtre ame toute cruauté, reprimer toutes affections illegitimes, forbannir toute volupté deshonneſte, fuyr auarice, auoir les mains nettes de rapine, volerie & autres extorſions : ſoulager les affligez iniuſtement, eſteindre toute incontinence & diſſolution charnelle, à laquelle ſi quelqu’vn conniue & s’abandonne tant ſoit peu, cette concupiſcence l’emportera comme feroit vne riuiere tres-rapide à beaucoup de ſales & deshonneſtes actions, indignes d’vn honneſte homme. Et d’autant que telles voluptez n’enfantent autre choſe que douleur & miſere, ſi quelqu’vn ſe detraquant de vertu enfile le chemin d’icelles, il ſentira