ET pour rembarrer la temerité des vilains & mal-viuans, qui par diſſolution & cupidité s’abandonnent à toute ordure & impurité, ils ont expoſé les incommoditez ſuruenuës aux Centaures à cauſe de leurs attentats. Car celuy qui ſe noye de vin par vn exceſſif vſage, qui obtempere aux ſales concupiſcences de ſa chair, qui rauit le bien d’autruy, qui ne ſçait ſe comporter en toutes ſes actions ſobrement & auec équité ; il eſt en fin contraint, à ſa grande confuſion & vergongne, d’abandonner ſa patrie, ſes moyens, ſon meſnage, ſes enfans, ſa femme, & viure ſouffreteux & banny parmy des eſtrangers.