De l’Ocean.

APrés auoir expoſé les effects des Elemens ſuperieurs & la vertu du Soleil, façonné l’ame humaine de bonnes mœurs & complexions ſelon les moyẽs & l’adreſſe qu’ils en ont euë, & declaré la nature de ce qui s’engendre en l’air, ils ſont puis aprés venus à l’explication de la nature des eaux : & ont dit que le ſouuerain Createur, tout bon & tout ſage crea l’Ocean, pere de toutes les eaux en general, luy commandant de ſe ſeparer de tous coſtez d’auec la terre, & faire quartier à part. Ainſi donc la bonté de Dieu meſlant toutes choſes, les excita pour engendrer chacune ſon ſemblable, comme diſent les Sages. Ils l’ont qualifié Pere de l’Vniuers, d’autant que les pluyes & les riuieres s’engendrent de l’Ocean, & d’elles procedent toutes ſortes d’animaux & de plantes. Et pour montrer que la prudence eſt ſingulierement requiſe és nauigations, ils ont dict que Promethee eſtoit fort bon amy de l’Ocean : car il ne faut pas ſeulement éuiter les eſcueils, mais preuoir auſſi les ſaiſons & les tourmentes qui peuuent auenir.