AInſi doncques Amphion fut à bon droict mis à mort par Apollon fils de Latone, pource qu’il ſe glorifioit trop de l’experience qu’il auoit à bien ioüer du luth & en la muſique. Car il tint quelques paroles iniurieuſes contre Latone & ſes enfans, diſant qu’elle n’auoit rien de plus excellent que le reſte des hommes, & que ſes enfans n’eſtoient que des lourdauts & des ignorans s’ils vouloient entrer au pair auec luy. Mais les Dieux qui haïſſent à mort l’arrogance des humains, ne pouuans ſupporter cette temerité d’Amphion, le punirent comme nous auons eſcrit cy-deuant. Et pourtant ſi nous auons quelque grace ſinguliere ou prerogatiue par deſſus les autres, il faut faire eſtat que ce bien-là ne nous vient ſinon de la faueur & bonté de Dieu.