DAuantage ils ont feint que Bellerophon eſt l’humeur eleuee par le mouuement du Soleil, pource que l’air eſtant humecté par la force du Soleil, la plus legere partie eleuee en haut eſt quelque peu de temps aprés renuoyee ça bas ; mais la plus ſubtile montant en la region du feu, la plus groſſiere eſt par Iupiter reiettee en-bas. Voyla comment le Pegaſe iette à-bas Bellerophon ſon Eſcuyer. Les autres accommodent tout ce conte à la nature des elemens, & au mouuement circulaire de generation.
Expoſition Morale.ILs ont auſſi voulu montrer qu’il fault ſagement paſſer le cours de ſa vie, ne ſe point trop affliger pour les aduerſitez & trauerſes ſuruenans, ny ſe trop enorgueillir de l’heureux ſuccez de ſes affaires, eſquelles rencontres il faut apporter vne moderation d’eſprit, & ne moins inuoquer le nom de Dieu en ſa proſperité qu’en ſon affliction. Car celuy qui durant ſa felicité aura trouué grace enuers Dieu, ſi quelque aduerſité luy ſuruient puis apres, il le trouuera preſt à l’en deliurer. Mais quiconque abuſant de ſon heureuſe condition deuient par trop outrecuidé, n’en ſçachant vſer auec modeſtie, Dieu vengeur de toute iniquité & d’arrogance, le precipite du plus haut grade de la felicité en laquelle il l’auoit eſtably.