DAuantage expoſans la matiere & nature de ce qui s’engendre & ſe forme en haut, ils ont controuué la Fable des Cyclopes, & dict qu’ils ſont les vapeurs deſquelles naiſſent & ſe font les foudres, les eſclairs & tonnerres ; leſquelles vapeurs attirees, partie de la mer, partie de la terre ; ne ſe peuuent extenuer en l’air que par la chaleur du Soleil. Or ces meſmes vapeurs ſont plus frequentes lors que les foudres ſe forment, & puis aprés ramaſſees & eſpaiſſies en haut par la force de la Lune, ſont chaſſees çà bas par la froidure d’enhaut.
Expoſition Morale.ILs dechifrent les Cyclopes comme gens impies, profanes & meſpriſans la Religion & ſeruice des Dieux, & adonnez à toute eſpece de cruauté & de barbarie : principalement leur Prince & chef Polypheme, qui n’eſtimoit rien d’honneſte que ce qui plaiſoit à ſon ventre, contempteur de pieté & de ſaincteté. Mais d’autant que Dieu venge ſeuerement telle impieté & profanation de ſon ſeruice, il receut pour tout le temps de ſa vie telle punition que meritoit ſa temerité & cruauté ; car celuy qui iadis n’auoit aucunement redouté la puiſſance de Dieu, le voila fort aiſément vaincu par la force du vin.