OR pour faire connoiſtre à toutes perſonnes que prudence eſt vne vertu neceſſaire en toutes choſes, ils ont controuué ce qu’ils ont eſcrit de Cadmus, comme qu’il ait par le conſeil de Minerue aſſommé cet hideux ſerpent en la fontaine de Dirce, & ſemé les dents d’iceluy, c’eſt à dire vn brigand auec ſes complices : parce qu’il eſt bien requis qu’vn chef de guerre ſoit doüé de ſinguliere prudence au faict & maniment des armes, & de ce qui depend de ſa conduite ; laquelle toutefois eſt vaine & de nul effect ſans l’aſſiſtance de Dieu. Quant à Harmonie, ils la font fille de Iupiter & d’Electre, pource qu’ils eſtimoient que les mouuemens des ſpheres & corps celeſtes rendiſſent vne harmonie & concert fort plaiſant à ouyr.