ET pour d’autant mieux nous exhorter à humanité, ils ne nous ont pas propoſé vn ſeul exemple, puis qu’ils ont tant celebré la courtoiſie de Midas en la reception & bon traittement qu’il fit à Silene : pour laquelle il auoit eſté fort bien ſalarié, s’il euſt eſté autant ſage & diſcret à demander & choiſir le preſent & faueur qu’il deſiroit receuoir, comme il auoit eſté liberal enuers ſon hoſte. Mais il ne faut point conditionner les demandes que nous faiſons à Dieu, parce que le plus ſouuent nous requerons ce qui nous ſeroit plus dommageable qu’vtile. Cette Fable auſſi nous aduertit de ne rien iuger temerairement ; pource que Dieu ne laiſſe pas longuement impuny vn iugement temeraire, ou fol, ou frauduleux.