De Sphinx.

CE qu’ils ont eſcrit de Sphinx tendoit pour exhorter vn chacun à prendre en gré ſa condition, & la ſupporter patiemment, veu que tout l’eſtat de la vie humaine eſt fort inconſtant, attendu que c’eſt la cõdition de l’homme d’eſtre ſubiect à mille pauuretez, & qu’il eſt force que bon gré mal-gré chacun ſouffre & tolere la vacation à laquelle il eſt appellé, & pour dire en vn mot, il faut neceſſairement que tous hommes viuent ſagement ſelon leur condition ; ou bien, s’ils ne le ſçauent faire, & ne la peuuent vaincre par patience, qu’ils ſoient en fin par elle meſme gourmandez & vaincus, & tumbent en toutes les miſeres du monde.