AV reſte quand ils ont voulu montrer que choſe aucune n’eſt point tant agreable à Dieu, ny tant duiſible à la vie humaine, que de ſe comporter ſobrement & auec moderation d’eſprit en quelque eſtat qu’on ſe rencontre, heureux ou non, ils ont inuenté pluſieurs Fables pour exhorter leur poſterité à ſupporter courageuſement toute forte de miſere & d’afflictions. Mais parce qu’il s’en trouue qui prennent bien en gré leurs aduerſitez, qui ne peuuent neantmoins vſer modeſtement de leur poſterité, ils ont forgé vne Nemeſis, fille de Iuſtice, tres-venerable Deeſſe, pour chaſtier ceux qui deuenus trop orgueilleux & inſolents de l’heureux ſuccez de leurs affaires, ne pourroient à cauſe de leur fierté compatir auec perſonne : laquelle eſt touſiours prompte & appareillee pour mettre en execution les commandemens des Dieux à l’encontre des hautains & ſuperbes.